«Բարեբեր» օրգանական այգի

«Բարեբեր» օրգանական այգին ստեղծվել է Արայի լեռան ստորոտում՝ Կոտայքի մարզի Արագյուղ համայնքում։ Այն ստեղծվել է գյուղատնտեսական հարուստ ավանդույթները վերարժևորելու և ժամանակակից օրգանական գյուղատնտեսության սկզբունքների հետ ներդաշնակորեն համադրելու գաղափարով։ Հազարամյակներ շարունակ այս տարածաշրջանի բնակիչները մշակել են հողը՝ ապավինելով իրենց գիտելիքին, փորձին և բնության հանդեպ հոգատար վերաբերմունքին։ Հողագործությունն այստեղ միշտ հիմնված է եղել բնական մոտեցումների և սերնդեսերունդ փոխանցված իմաստության վրա։ «Բարեբերը» շարունակում է այս մշակույթը՝ պահպանելով դրա արժեքավոր ժառանգությունն ու հարմարեցնելով այն մեր ժամանակների պահանջներին։ Ծովի մակերևույթից շուրջ 1650 մետր բարձրության վրա գտնվող մեր տնտեսությունում աճեցնում ենք օրգանական ելակ, խոտաբույսեր և հացահատիկային մշակաբույսեր։ Մաքուր բնությունը, բարենպաստ կլիման, գյուղատնտեսական ժամանակակից մեթոդներն ու միջազգային փորձի վրա հիմնված լուծումները մեզ հնարավորություն են տալիս ստանալու բարձրորակ և բնական արտադրանք։ Մեր հիմնական արտադրատեսակներից օրգանական ելակն առանձնանում է իր հարուստ համով, բույրով և բարձր որակով։ Աճեցնում ենք նաև խոտաբույսեր, որոնք նախատեսում ենք օգտագործել բնական թեյերի և այլ օրգանական արտադրատեսակների ստեղծման համար։ Մեր մշակած հացահատիկն էլ ապագայում կդառնա առողջարար օրգանական հացի հիմքը։ «Բարեբերի» գործունեության առանցքում բնության հանդեպ պատասխանատվությունն է։ Մենք հավատում ենք, որ առողջ հողը, մաքուր արտադրանքը և մարդու ու բնության ներդաշնակ համագործակցությունը կայուն գյուղատնտեսության կարևորագույն նախապայմաններն են։ Մեր նպատակն է ոչ միայն ստեղծել բարձրորակ օրգանական արտադրանք, այլև պահպանել ու զարգացնել գյուղատնտեսական ավանդույթները՝ ձևավորելով կայուն և պատասխանատու մի մոդել, որը կարող է ոգեշնչել ու օրինակ ծառայել նաև ուրիշներին։

Ընկերությունը զբաղվում է օրգանական ելակի և սերկևիլի արտադրությամբ՝ համադրելով ավանդական գյուղատնտեսական գիտելիքն ու ժամանակակից օրգանական գյուղատնտեսության սկզբունքները՝ սպառողին առաջարկելով օրգանական արտադրանք։

Սերտիֆիկացված: Սերտիֆիկացումը կատարվել է «Էկոգլոբ» ընկերության կողմից:

Օրգանական ելակ, ցորեն

Ընկերությունը իրականացնում է ինչպես մանրածախ, այնպես էլ մեծածախ վաճառք։ Գնելու կամ համագործակցության համար կարող եք հետևել և կապ հաստատել ընկերության հետ՝ հատկապես սոցիալական հարթակների միջոցով։